KANGATOAN NGA SALUDO KEN PAMMADAYAW KENNI
PROCOPIO “KA PYRO” TAURO
Lider ti rebolusyon, Banwar ti Umili!
Diego Wadagan
Maika-2 ti Nobyembre, 2010
Idi 5:20 ti agsapa ti Oktubre 30, 2010, maysa ni Ka Pyro kadagiti nangidaulo iti taktikal nga opensiba nga insayangakat dagiti nallabbaga a gerilya ti Agustin Begnalen Command. Iti umuna nga 10 a minuto ti rinnupak, napuntaan ni Ka Pyro bayat nga timmakder tapno putukan ti grenade launcher dagiti kalaban nga kameng ti Alpha Coy, 41st IB. 9:10 idi pimmusay ti maysa mga Kadwa, lider ti rebolusyon, ken banwar ti umili. Manipud idi rugi ti panagplano, panagsagana, aginggana panangipatungpal, pursigido nga timmarabay ken indauloan ni Ka Pyro ti nagballigi a taktikal nga opensiba sadiay Abra-Kalinga Road, Lenneng, Baay-Licuan, Abra.
Ni Ka Pyro ket naiyanak ken dimmakkel iti Benben, Lapaz, Abra. Naiyanak nga Procopio Tauro iti maysa a pamilya nga napanglaw a mannalon (tenant) iti probinsiya nga pag-ar-arian dagiti warlords, sinagrap ni Ka Pyro dagiti rigat ti biag ti maysa nga mannalon ken ti naulpit nga turay dagiti warlords. Nag-adal isuna babaen iti scholarships ken bukod nga panagpartuat ti kasapulan na. Numanpay saan nga kolektibisado nga aktibista, pinagpupudutan dagiti warlords ti pamilyana gapu iti panagsuportada iti rebolusyonaryo a tignayan ken iti panakaitipon ti pamilyana iti tradisyunal nga partido nga oposisyonista. Impapatay ti warlords ti kabsat na, ken naibalodda nga ag-aama ti agkurang maysa nga tawen, gapu iti pannakadarumda iti rebelyon.
Ti mismo nga kapadasan ken ti natadem nga panag-agsep na kadagiti rebolsuyonaryo a teorya ti gapu nu apay nga napinget iti panagtignay ken nairut nga pinetpetan ni Ka Pyro dagiti batayan nga rebolusyonaryo a prinsipyo. Iti intero a panawen nga adda isuna iti BHB, nasinged ti relasyonna kadagiti batayang masa nga mannalon kangrunaan gapu iti panagpursigi na kadagiti programa ti rebolusyong agraryo; nalaing nga organisador ni Ka Pyro kadagiti batayang masa nga mannalon. Napinget met isuna nga labanan ti warlordismo. Numanpay gapu met laeng iti mismo nga kapadasan na iti kinarigat ti biag ti mannalon ken pannakalipit ti warlordismo ket adda dagiti kakapuyan na iti aplikasyon ti rebolusyonaryo a linya ken duwaan-a-taktika iti panaka-relasyon kadagiti nangato a saray ti mannalon ken iti panakikaysa-a-prente, sekundaryo daytoy nga salik.
Indauloan ni Ka Pyro dagiti trabaho ti Partido ken Hukbo nga naririgat ken atrasan ti dadduma nga Kakadwa. Maysa isuna kadagiti nangidaulo iti panaglukat ken panagpursigi nga tignayan ti nadumaduma a paset ti Abra, a kas iti NW-NISSIN, SC, ken AMPIS. Iti sango ti rigat iti biag ken atake ti kabusor, naibtor isuna ken nalaing nga idaloan ti pwersa tapno tumibker ti pakinakem ken pangeddeng. Nagtignay met laeng isuna iti SB sakbay nga simmampa isunga makuna nga nauneg ken nalawa nga talaga ti kaamoan na iti kasasaad ken trabaho iti entero a probinsiya ti Abra.
Nalaing nga edukador ken propagandista ti batayang masa ni Ka Pyro. Nauneg ti kaamoan na kadagiti problema ti masa, nalaing isuna kadagiti detalye dagiti usapin, pasamak ken paka-istoryaan; banag nga mangpabagas kadagiti rebolusyonaryo a teorya ken mangipalawag kadagiti patakaran ken programa tapno nalaka nga maawatanti masa.
Gaputi nakairanudan nga burges-dekadente a panagbiag idi panawen nga nagbasbasa ken idi nabiit nga nagtrabaho iti reaksyonaryo a gobyerno, nag-biag kas lumpen-intelektwal ni ka Pyro. Naigamer iti bisyo ken naguyod kadagiti burgis-pyudal nga relasyon. Kongkreto iti kapadasan na ti burukrata-kapitalismo nga makagapu nu apay nga napinget isuna nga labanan daytoy; dinadael ti bisyo ti bagi na isunga nagpursigi nga mammaminsan nga ikkaten dagiti bisyona ken nasalun-at nga mangan ken agbiag; nasikogan na ti maysa nga babai nga saanna nga inasawa nga ina ti putot na nga dinungdungona ken naanus nga inuray na nga makita, matarabayan, ken maikamakam nga pana-panawen a maka-inniliw.
Numanpay nagbidbiddut iti napalabas, pagwadan ni Ka Pyro iti panagpursigi nga maka-ilinteg ken agtignay latta kalpasan nga ma-DA. Napnoan isuna ti rebolusyonaryo nga optimismo isunga uray iti sango ti rigat ken nagkapuyan, mamati isuna nga marimbawan dagitoy ken matan-awan na ti nalabbaga a masakbayan. Uray iti panag-ayat ken panag-arem, napinget ken optimista ni Ka Pyro.
Nairut nga pinetpetan ni Ka Pyro ti kina-husto ti armado a pannakidangadang ken impangruna na daytoy. Tapno rimbawan tayo ti konserbatismong-militar, nakikuyog isuna kadagiti operasyon ken aktibo nga nakipaset iti Provincial Operational Command. Ti Project Tarzan ket makuna nga maudi nga proyekto ni Ka Pyro. Manipud rugi ti panangisagana, panagresut kadagiti problema iti intel, battle planning, aginggana iti panangiruswat kadagiti wargames ken aktwal nga panangisayangkat ti taktikal nga opensiba, direkta nga nakipaset ti Ka Pyro. Indaton na ti kakaisuna a biag na tapno maiyabante ti armado a pannakidangadang, mapaay ti Oplan Bantay Laya 2, maiyabante ti rebolusyon iti Estratehiko a Panagpapatas aginggana iti Balligi.
Ti biag ti maysa nga rebolusyonaryo ket rumbeng nga rukuden kadagiti aktwal nga kontribusyonna iti rebolusyon. Awan ti panagdudwa, napapateg ken istratehiko dagiti naiyambag/naisakop ni Ka Pyro iti rebolusyonaryo a tignayan, saan laeng nga iti probinsiya ti Abra, nu di ket uray iti rehyon ti ICR. Maputed ti anges ti maysa nga rebolusyonaryo, ngem agtultuloy ti nirugianna babaen kadagiti umili ken rebolusyonaryo nga pinamulatanna, naorganisa, ken napatignay. Agginggana iti maudi nga anges na, ni Ka Pyro ket natay saan laeng kas maysa a rebolusyonaryo, nu diket kas maysa nga mangidadaulo a proletaryado.
Ti panagladinget ket ibaw-ing iti rebolusyonaryo nga pangibales ken regta!
Agbiag ti narimat nga paka-istoryaan ni Procopio “Ka Pyro” Tauro!
Agbiag ti pudno nga lider ti rebolusyon ken banwar ti umili!
Itultuloy ti laban ni Ka Pyro ken dagiti martir aginggana’t balligi!
Iyabante ti nailian-demokratiko a rebolusyon aginggana’t balligi!
No comments:
Post a Comment